Prorektori Dukagjin Leka promovon projektet dhe integritetin akademik të UKZ-së në festivalin ndërkombëtar DIGEAT në Lecce të Italisë

Prorektori për Bashkëpunim Ndërkombëtar dhe Projekte në Universitetin Publik “Kadri Zeka”, Prof. Dr. Dukagjin Leka, ka marrë pjesë si folës kryesor në dy panele të veçanta në DIGEAT Festival, që u mbajt në Lecce të Italisë, me ftesë të Komunës së Lecces, Universitetit të Salentos dhe Rrjetit të Juristëve Italian. Ai u ftua zyrtarisht në cilësinë e Prorektorit për Bashkëpunim Ndërkombëtar dhe Projekte të UKZ-së.

Në panelin e parë, i cili përfshinte profesorë nga Italia, Mbretëria e Bashkuar, Argjentina, Rumania dhe Turqia, Prof.Dr. Dukagjin Leka prezantoi rëndësinë strategjike të bashkëpunimit ndërkombëtar dhe projekteve për institucionet e arsimit të lartë. Ai solli para audiencës disa nga shembujt më të suksesshëm të Universitetit “Kadri Zeka”, si projektet EDUFAIR, DELTA dhe GreenWB, duke theksuar ndikimin e tyre pozitiv në procesin e ndërkombëtarizimit dhe zhvillimit institucional të UKZ-së.

Paneli i dytë, me pjesëmarrës nga Meksika, Franca, Italia, Egjipti dhe Spanja, ishte i fokusuar në temën e integritetit akademik. Prorektori Prof. Dr. Dukagjin Leka prezantoi sfidat me të cilat përballet Kosova dhe rajoni në këtë drejtim, duke theksuar mungesën e infrastrukturës së plotë ligjore dhe faktorët e tjerë që ndikojnë në ruajtjen e standardeve akademike. Ai ndau përvoja dhe raste konkrete që ilustrojnë nevojën për qasje të reja dhe më të strukturuara në promovimin e integritetit akademik.

Në përmbyllje të vizitës, Prorektori Leka dha një intervistë për një televizion italian, ku foli për rëndësinë e pjesëmarrjes së tij në këtë ngjarje ndërkombëtare dhe rolin e UKZ-së në arenën akademike evropiane.

Pjesëmarrja në DIGEAT Festival është i rëndësishëm në rrugën e ndërkombëtarizimit të UKZ-së, ku bashkëpunimet dhe projektet ndërkombëtare po dëshmohen si komponentë kyç në zhvillimin dhe avancimin e universitetit.