Eko-ulëse me energji solare vendoset në UKZ nga MMPHI në kuadër të Javës Evropiane të Lëvizshmërisë 2025

Në kuadër të aktiviteteve për Javën Evropiane të Lëvizshmërisë 2025, Ministria e Mjedisit, Planifikimit Hapësinor dhe Infrastrukturës  e Kosovës (MMPHI) ka dhuruar dhe vendosur një eko-ulëse me energji solare në hapësirat e Universitetit Publik “Kadri Zeka” në Gjilan.

Universiteti ka siguruar një vend të përshtatshëm në oborr, i cili është i ekspozuar ndaj diellit gjatë gjithë ditës dhe shfrytëzohet rregullisht nga studentët. Kjo ulëse moderne u ofron studentëve dhe stafit mundësinë për të pushuar, për të shfrytëzuar energjinë e ripërtëritshme dhe për të pasur qasje në teknologji të gjelbra brenda ambientit universitar.

Në këtë ngjarje morën pjesë Rektori i Universitetit, Prof. Asoc. Dr. Artan Dermaku, si dhe zyrtarë të MMPHI-së. Gjatë fjalës së tyre, ata theksuan se vendosja e kësaj eko-ulëseje është një shembull konkret i bashkëpunimit ndërmjet institucioneve arsimore dhe atyre shtetërore, me synim promovimin e energjisë së pastër, kujdesit ndaj mjedisit dhe ndërgjegjësimit të gjeneratave të reja për rëndësinë e lëvizshmërisë së qëndrueshme.

Rektori Dermaku, në fjalën e tij, tha se vendosja e kësaj eko-ulëseje është një hap i vogël, por shumë domethënës drejt krijimit të një kampusi më miqësor me mjedisin. Studentët tanë jo vetëm që do të përfitojnë nga përdorimi i teknologjisë së gjelbër, por edhe do të ndërgjegjësohen më shumë për rëndësinë e energjisë së pastër dhe lëvizshmërisë së qëndrueshme. “Universiteti ynë do të vazhdojë të mbështesë iniciativa të tilla që ndikojnë drejtpërdrejt në cilësinë e jetës së studentëve dhe komunitetit,” ka thënë Rektori Prof. Asoc. Dr. Artan Dërmaku.

Ky aktivitet është pjesë e nismave të shumta që po realizohen në Kosovë për të përkrahur tranzicionin e gjelbër dhe qëndrueshmërinë mjedisore, duke u fokusuar në përmirësimin e cilësisë së jetës dhe promovimin e alternativave ekologjike.