Universiteti Publik “Kadri Zeka” nënshkruan marrëveshje bashkëpunimi me Shkollën “Hello Academy of Education

Universiteti Publik “Kadri Zeka” në Gjilan ka nënshkruar sot një marrëveshje bashkëpunimi me Hello Academy of Education. Nënshkrimi i Memorandumit të Mirëkuptimit ka si qëllim ngritjen e cilësisë në arsim, ndarjen e përvojave akademike dhe krijimin e mundësive të reja për zhvillim profesional për studentët dhe mësimdhënësit.

Nënshkrimi i marrëveshjes u bë nga Rektori i Universitetit, Prof. Asoc. Dr. Artan Dërmaku dhe Drejtori i Hello Academy of Education, z. Florian Kurteshi. Gjatë këtij takimi, u theksua rëndësia e krijimit të lidhjeve ndërmjet arsimit të lartë dhe atij fillor për të përmirësuar cilësinë e arsimit në Kosovë.

Marrëveshja përfshin disa fusha kyçe të bashkëpunimit, duke përfshirë, mundësimin e praktikave profesionale për studentët e Fakultetit të Edukimit të UKZ-së; Trajnime dhe punëtori të përbashkëta për mësimdhënësit dhe studentët; Zhvillimin dhe ndarjen e metodave të reja në mësimdhënie; Mbështetje për projekte kërkimore dhe inovative në edukim; Aktivitetet e përbashkëta edukative dhe kulturore për nxënës dhe studentë; Shkëmbimi i burimeve akademike dhe digjitale për përmirësimin e cilësisë mësimore.

Ky bashkëpunim përfaqëson një hap të rëndësishëm për UKZ, duke i ofruar mundësi të reja studentëve dhe mësimdhënësve dhe duke kontribuar në zhvillimin dhe përmirësimin e sistemit arsimor të Kosovës.